الثلاثاء، 30 سبتمبر، 2008

تاج .. و كل عام و أنتم بخير.. عيدكم مبارك


قبل أي تاج أو أي حاجة ..

عاوزة أعيد عليكم كلكم .. و أقولكم كل سنة و انتم طيبين ..
أنا قصرت في المدونة عشان رمضان .. و أنتم عارفين ان رمضان شهر عظيم .. آثرت أن أتفرغ له بشكل شبه كامل..
عسى أن يغفر ذنبي غافر الذنب و أن يقبل توبتي قابل التوب .. سبحانه جل و علا ..

___________

التاج بقى ..
التاج دة جالي 3 مرات في شهر واحد ..
من ليســــــاندرا
و من The Führer
و من ديـنـــــــــا
و بعتذر عن التأخير في الرد .. لكن المهم اني رديت .. المهم الهدف يعني :)
السؤال الأول: بدأت تدون إمتي؟ ودخلت عالم التدوين إزاي ؟
بدأت التدوين من آخر 2006 من شهر أغسطس .. كان عندي مدونة في مكتوب و لغيتها ..
دخلت ازاي .. دخلت من باب الفضول .. أشوف لو دونت أو كتبت هيحصل ايه .. و بس ..!
السؤال الثاني : إيه كان انطباعك في البداية؟
انطباعي ؟؟
انا كنت باقرأ لصحفيين كتير اوي عاملين مدونات على مكتوب و بيكتبوا في الجرايد الكويتية باعتبار اني مقيمة في الكويت يعني ..
يعني كنت حاسة ان الجانب السياسي غالب على المدونات بشكل عام ..
يعني دايما بتلاقي الجانب السياسي و الاجتماعي ظاهرين في بصمة اي مدون .. و تأثير ثقافته و بيئته و نشأته ..
و التدوين مش وحش .. كفاية انه عرفني على ناس زي العسل زيكم كدة و بقى عندي صحاب زي ليساندرا و ميرو و يوما و سارة .
السؤال الثالث: مين أكتر واحد بتحب تعليقه علي بوستك الجديد؟
أي حد هيقولي الصراحة طبعاً :)
و أي تعليق بيجيلي باهتم بيه جداً.. و يا ريت يكون نقد كدة عشان استفيد .. حتى لو باسلوب مش كويس زي ما بعض الناس بتعمل ..
بس انا باتقبل النقد جداً.. :)
السؤال الرابع: أهم حاجة اتعلمتها من عالم التدوين؟
إني أكبر دماغي :)
و ادي الاشياء احجامها الطبيعية .. فعلاً.. كنت في اول ما بدأت اتعلم موضوع التدوين ..
كنت على فكرة حادة جداً.. أي حد يقول تعليق بايخ يضايقني و اي حد ينقدني بشكل هدام ينرفزني ..
دلوقتي خلاااااص .. عادي بقى .. :)
السؤال الخامس: حاسس إن التدوين له تأثير؟
التدوين و الله منفذ كويس للهوايات .. الكتابة بشكل عام مريحة ..
و في مدونات ليها تأثير خصوصا المدونات الصحفية اللي بتحاول تكشف الحقايق . . و بتشكل نوع من الاعلام الصريح .
السؤال السادس: تهدي التاج لمين؟
و كل سنة و انتم طيبين و لقلبي قريبين .