صفحة .. الخميس 21 مايو 2009

مش هعرف اكتب بالفصحى النهاردة .. مش هاعرف
الصفحة دي لازم تتكتب كدة
كنت عاوزة أكتب بالانجليزي او اعمل مدونة تانية جديدة
بس كدة مدوناتي كترت اوي
انا مش عاوزة ابهدل نفسي في موضوع الكتابة لأني باتشتت بسرعة
__________

الشغل النهاردة كان متعب أوي ، مسيطرة عليا حالة من الإحباط .. قربت افقد السيطرة. مدير المشاريع بتاعي شخصية مريضة
مابيحبنيش
هو اكيد مش لازم يحبني يعني عشان الشغل يمشي حاله .. بس هو مش متقبل فكرة وجودي بالأساس
مدير المشروع شخصيته ضعيفة .. جدا.. كلمة توديه و كلمة تجيبه و مابيحميش اي حد بيشتغل معاه
عامل زي خيال المآتة .. و لا له أي لازمة ..
الراجل مدير المشاريع بيقول.. انه هيجيب حد غيري يكمل المشروع .. كان بيراقب رد الفعل على وشي و مالقاش اي رد فعل من أي نوع
قام قالي انا باهزر معاكي .. برضه رد الفعل عندي اللي هو اللاتعبير ماتغيرش
انا اصلا الحاجات دي مابتفرقش معايا .. يعني عادي..
انا مش بشتغل عشان مش لاقية آكل
و لا عندي حد اجري عليه مثلا و اترجى الفاشل مدير المشاريع دة عشانه
هو استغرب عشان ماخفتش منه
هو انا هاخاف منه ليه؟؟
_________

أنا زهقت اوي من الشخصيات الكسيحة نفسياً اللي عدت عليا في حياتي قبل كدة
زهقت من ظهورهم في حياتي بشكل مش مباشر ..
اللي مستني حد يأكله و يشربه و يجيب له شغل .. و هو صفر
صفر.. مايعرفش حاجة و لا يفقه في العلم شيء..
و معاه شهادة اي كلام ماحاولش حتى يطورها
.. مش قادر يفهم ان الشهادة الجامعية المفردة دي مابتعملش حاجة
لازم يبقى في جنبها حاجات كتير عشان يقدر يلاقي شغلانة متوسطة كريمة
عشان هي دي الدنيا دلوقتي
مصيبة كبيرة اوي اوي انك تبقى معدي التلاتين و مش واخد بالك انك ماتحركتش و لا خطوة
و مستنيني انا أزقك !!
شغل بقى التعاون و عمل الخير و كدة .. دة في الجمعيات الخيرية مش عندي
و الكفاح المشترك دة كان ايام العدوان الثلاثي.. و احنا دلوقتي في 2009

____________

سمر اتكلمت مرة عن فقدان الإيمان بالأشياء
انا باعلن هنا اني فقدت الإيمان بنص المباديء اللي اعرفها
مش رغبة في مجاراة التيار
بس دي حقيقة .. انا مرتاحة كدة اكتر
الناس لما تحترمهم يفتكروك ضعيف
و لما تبقى مؤدب معاهم يفتكروك خايف
يمكن عشان اغلبهم متعود على ثقافة راعي الغنم
اللي لازم يكون معاه عصاية للغنم
كمان الحق لازم يكون له قوة تحميه
القوة دي ممكن تكون طولة لسان او فلوس او سلطة او اي حاجة
المهم يكون في جنبه حاجة تخوف
عشان الناس تحترمه
في فئة واسعة جدا ماينفعش معاها الا الكلام دة
لازم تتهدد كدة عشان تخاف .. زي الغنم
_______________

مابقيتش باصدق حد
قيمة افتراض الصدق عند الآخرين عندي اتمسحت
مش فاكرة مين آخر حد مسحها لأنها تقريبا زالت تدريجيا على مر السنين اللي فاتت
و التسامح كمان اتمحى
دة برضه راح على مر السنين
كان في كل موقف رصيدي من القدرة بيخلص منه شوية
لحد مالقيت نفسي مش عارفة اسامح حد

________________

أنا باكره كل الشخصيات الكسيحة نفسياً بأنواعها
باكرههم لأنهم ضيعوا وقتي و حياتي و عمري
و ثمن الحاجات دي غالي أوي
ان شاء الله هتبقى بناتهم او زوجاتهم يدفعوها
و الزمن داير
فوجئت اني اتعلمت أكره لما حد منهم حصلت له حاجة مش كويسة و لقيت نفسي باقي اليوم مبسوطة
لأنه يستاهل دة و أكتر
مش قلت قبل كدة انا شخصية بغيضة ؟؟

_________

على الهامش :

I don't Know How to Write this in Hangul

But i Just wanted to tell you that ..

I'm waiting.. and counting down

;)