في وسط كل الزحمة دي .. انت لسة موجود .. !!
و لسة بحاول اطلعك من راسي .. بأي شكل .. لدرجة اني فكرت أكسرها عشان أطلعك منها و اللي يحصل يحصل ..
عامل لي صداع رهيب .. و مضايقني أوي ..
مش عشان انت مش كويس .. و مش عشان تعبتني .. لأ .. السبب مختلف ..
إنت الشق الهوسي الوحيد في شخصيتي .. !!
عاوزة أتخلص من الهوس دة .. عاوزة أبطل أعد كلامك اللي قلته و اللي هتقوله و اللي بتقوله في راسي طول الوقت ..
عاوزة أنسى ..
أنا مش قادرة افتكر حياتي كانت ازاي اصلا من غيرك ..
تعبت اوي ..
باشوف خيالك في كل حتة بالرغم من اني مش حافظة شكلك كويس ..
و بحاول أتغلب عليك بقوتي كلها .. مش عاوزة أحلم بيك أكتر من كدة .. انت زي السراب .. و انا لسة متخيلة اني هاقدر امسكك !!
تعرف ..
النهاردة حصلت معايا حاجة غريبة اوي ..
و اتاكدت منها بمقولة بتقول :
ان الناس اللي انت بتقرر تنساهم .. بيحاولوا يوصلوا لك و يفكروك بنفسهم في نفس اللحطة اللي انت قررت تنساهم فيها ..
دة حصل معايا النهاردة .. !!
افتكرتك .. بالرغم من اني مش فاكرة اني نسيتك ..
انت في بالي على طول ..
في الاول كنت بتجنب اي حد يقطع عليا وحدتي عشان بابقى عاوزة اسمع صوتك جوايا بهدوء ..
لكن دلوقتي .. بحاول اقعد مع اي حد و اتكلم مع اي حد في اي حاجة حتى لو انا مش مهتمة بيها عشان ماتبقاش موجود وسط الكلام ..
و فجأة باسكت لما بسمعك بتنادي عليا من جوايا تاني .. و مابقدرش اركز تاني في اي كلام كنت باقوله ..
طول مانا ماشية في الشارع باشوف علامات كتيرة اوي ..
باسمع اغنية انت بتحبها بالرغم من انها قديمة في كوفي شوب المفروض انه مابيشغلش الا مزيكا لاتينية !!
باسمع اسامي البنات اللي انت بتحبها .. طول الوقت في بنات معدية .. اسمهم منة و منات و سهى .. !!
الشيكولاتة اللي بالنعناع .. مزاجك المفضل .. بتتباع طول الوقت في كل المحلات بتاعت هدايا الكريسماس .. بالرغم من انها كانت بتبقى نادرة اوي قبل كدة !!
الاسكارفات اللي انت بتحبها .. بالألوان اللي انت بتحبها .. موجودة في دبنهامز اللي عمره ما عرض اسكارفات رجالي قبل كدة !!
تتبع أثرك محاولة فاشلة اوي .. و في أمل ضعيف جداً ..
ان انت كمان .. تكون بتفكر فيا بنفس الطريقة .. بس مهما وصلت .. عمرها هتكون بنفس الهوس ..!!
__________
ملحوظة و منعًا للخلط ..
اللي مكتوب عشانه الكلام دة .. عمره ما هيعرف يقراه بالعربي .. من غير ترجمة .
"افتكرتك بالرغم من إني مش فاكره إن نسيتك"
ردحذفــــــــــــــــــــــــــــــــــــــــــ
المشكلة في اللي فهموا الكلام ده باللغة دي ومش عارفين يعلقوا عليه لا باللغة دي ولا بأية لغة أخرى :)
أطيب تحياتي
جميله أوي و حسيتها أوي عشان الصوت الداخلي ده مبيحصلش غير لما يكون الهوس بجد و مهما حاولتي تسكتيه صوته هيعلى و لو سكت أكيد هيبقى مكانه وحده و فراغ محدش يقدر يملاهم.
ردحذفبس هو ليه مش هيفهم الكلام ده هو عميل أجنبي :))
أرق تحية لكي
شيرين سامي
صباح الغاردينيا شيماء
ردحذفعلى الرغم انه الشق الهوسي في شخصيتك
بس لو قعدتي بينك وبين نفسك هتلاقي انه حاجة
بتحتاجيها وبترتاحي معاها وساعات لما بتبقي
بتحاولي تنسي الهوس دا بتشتاقيله اكتر
ويمكن جماله انه هوس بجد "
؛؛
؛
بحب كتير كلامك
والنهرده حسيت بـ إحساس مختلف
في كلام شيماء
على فكرة إختيارك للصورة روعة عجبتني اوي :) "
؛؛
؛
لروحك عبق الغاردينيا
كانت هنا
reemaas
سيبك انتى .. احلى حاجه الملحوظه :)
ردحذفتختلف المشاعر ساعات بكون عايز انسى انسان بحبه وماتزال ذكراه تقطع طريقى وساعات اخرى بكون عايز انسى انسان بكهره وبرضه ذكرياتع المؤلمة تقع عائقا فى طريقى
ردحذفرائعه فيها حاجات كتير مستنى ووجعتنى
ردحذفتحياتى
ملحوظه:لو قرا الكلام بالعربى هيعرف يقراه بس عمره ما هيفهمه
صح جدا المقولة اللي انتي قولتيها اما بتحاولي تنسي ناس معينة يحاولوا فعلا يوصلولك و يفكروكي بنفسهم معرفش دي بتبقى مقصودة ولا مجرد صدفة
ردحذفعجبني كلامك اوي و حسيته من جوه اوي اوي اوي
تحياتي ليكي :)
طيب كويس انه مش بيفهم عربي :)
ردحذفبالنسبة للشكولاته بالنعناع لذيذة قوي ومنعشة قوي قوي قوي ..
أعجبني احساسك ِ هنا
ردحذفكوني بـ خير
فعلا الناس اللي بتقرر تنساهم دايما بيفكروك بنفسهم وقت ما تققر انك تنساهم
ردحذفكتبتي جزء مهم مني :)