الواجب دة .. جاي من عند محمود .. إنسان بلا عنوان ..
أنا عارفة إن واجباتي كترت :)
استحملوني شوية .. و استحملوا ضعفي .. و عدم استقراري ذهنياً :)
1- أذكر صفتين لا يعرفها من يحدثك لأول مرة
أول صفة : إني رومانسية جداً .. جداً .. رومانسية كدة من أيام قيس و ليلى و الحاجات دي .. !
ثاني صفة : أني دقيقة و ذكية و لماحة .
2- أذكر صفتين يراها الناس فيك وهى ليست كذلك
أول صفة : إني جامدة معنديش مشاعر .. لأن شكلي جاد جداً.. دة ناتج عن الشغل و مسؤوليته .. و دايماً مكشرة كدة و ضاربة بوز عشان الناس تعرف تشوف شغلها .
ثاني صفة : إني عنيدة .. و دة مش صح .. انا عمري ما كنت عنيدة أبداً .. انا عادلة جداً في أغلب الحاجات .. دة لو مشاعري برة الحساب .
3- أذكر ثلاثة من مدوناتك المفضلة
مدونة الجميلة سمر ..
http://abrokentoy.blogspot.com/
مدونة الشاطرة أوي .. الأشطر مني :) لمياء محمود
http://lamiaamahmoad4810.blogspot.com/
مدونة الرقيقة جداً .. إسراء حامد ..
http://dr-esso.blogspot.com/
4 - لو معك ثلاث وردات لمن تهديها
أول وردة : لأسرتي الغالية .. بابا و ماما و اختي و اخويا .. و كلهم .
ثاني وردة : لنفسي .. أستاهل وردة طبعا ً على اللي بيحصل فيا دة !!
ثالث وردة : لسمر و ساجدة و أنجيل و هاني غبريال و أيمن حكيم .. و ساجي طبعاً . ( ناس كويسين وقفوا جنبي بجد )
5- من هو افضل رئيس عربى برأيك برر بسببين
الشيخ زايد رحمه الله ..
أول سبب : كان حكيماً عادلا و نهض ببلاده بشكل جميل جداً
ثاني سبب : كان بيمد يد العون للمنسلمين في كل مكان .. و تجاربه واضحة جداً ( دة مش نقلا عن محمود بس دة رأيي فعلا .. و ماكنتش ناوية اقول غيره )
6- شخص كنت تتمنى وجوده بحياتك من زمان
في ناس عرفتهم متأخر وزعلت أوي اوي اني عرفتهم متأخر .. متهيألي لو كنت عرفتهم بدري شوية .. كان فرق معايا و معاهم كتير ..
و في ناس عرفتهم مثلا ايام الكلية لما كنت في بكالوريوس .. و زعلت اني ماعرفتهمش من اول ما دخلت ..لأننا اتفرقنا بسرعة بعد الدراسة ..
و كنت بقول اننا لو عرفنا بعض من مدة .. كنا هننبسط لوقت أطول مع بعض .
7- شئ فعلته وندمت
:) السؤال دة صعب جداً .. جداً ..
بس بعد تفكير .. بشكل عام .. مش ندمانة على أي حاجة عملتها . . خالص ..
أي حاجة عملتها اتعلمت منها .. و الغلط بيعلمنا الصح .. الندم أصلاً مش صحي و مش صحيح في كثير من الأحوال .. بس احيانا لازم نندم ..
انا ندمانة على تصرفاتي الأسابيع اللي فاتت .. من يوم 25 يوليو لحد اول امبارح .. و انا فاقدة اتزاني .. !!
انا اتصرفت تصرفات وحشة اوي لأني كنت مجنونة تقريباً .. !!
التصرفات اللي عملتها من غير تفكير دي .. و جرحت نفسي اوي على فكرة .. و متضايقة من نفسي .. جداً.. لأني حطيت نفسي في موقف بايخ .. و اتصلح بالعافية .. عملت كوارث فعلاً .. !
لما بابقى مكتئبة او زعلانة او مكسورة ببقى مش بفكر .. مخي بيقف تماماً.. نفسي اتدرب اتصرف كويس في الحالات دي !!
8- شئ لم تفعله وبردو ندمت
:)
حاجة واحدة .. قول حاجات ..!!
بس في منهم حاجة ..
محدش عارفها غير انا و حد تاني ..
مش هقدر احكيها للأسف ..! :)
بس بشكل عام .. لو كان اليوم دة اترتب كويس .. كانت كل حاجة اختلفت ..!!
حاجة هاحكي عليها .. مرة تخاذلت عن مساعدة صديقة ليا .. لسبب تافه و انا خجلانة جدا من نفسي و الله .
9- حلم تتمنى تحقيقه
نفسي أتزوج كدة حد انا بحبه ، و اجيب منه آسر و سندس .. أو هديل .. مش مهم :)
بس هو ييجي ..!
10- إختصر نفسك فى ثلاث أسطر
واحدة .. بس بيحصل معاها حاجات كتير اوي اوي غصب عنها .. طريقها صعب .. لوحدها أوي .. محدش بيفضل معاها .. أحلامها بتتكسر واحد ورا التاني .. و بيتحقق لها أحلام تانية خالص .. مش بتاعتها أصلاً .. و بتحاول إنها تعيش .. بتحاول ترضي ربنا و تقرب أكتر .. ناجحة و ذكية و طموحة .. و بتحاول تعيش بالرغم من الضعف و الوجع و التعب و لازالت عاشقة من الدرجة الأولى .. و ستظل .
أهدى التاج لثلاثة مدونين
ثلاث مدونين .. يبقى نهدي التاج .. لمين ؟ ؟
سمر طبعاً .. :)
إسراء ..
و لمياء ..
و بس :)
و نورتوا كلكم .. :)
