الجمعة، 13 أغسطس، 2010

رمضانيات ..1


بسم الله الرحمن الرحيم
زبائني الكرام ..
كل سنة و انتوا طيبين و ينعاد عليكم بالصحة و العافية انتوا و كل اللي بتحبوهم ..
النهاردة 3 رمضان ..
سبحان الله رمضان بيعدي بسرعة جدا جدا .. و الله فعلا مش باحس بالوقت فيه ..
رمضان نعمة عظيمة يا جماعة .. و الله نعمة تستحق الشكر ..
طبعاً مش هاقول النصايح المعتادة بتاعت ماتضيعوش وقتكوا قدام التلفزيون .. مش هاقعد اقولكوا صوموا و صلوا و مش عارفة ايه ..
كل مسلم أدرى بمصلحته يعني :)
بس هاقول حاجة واحدة يا جماعة ..
تكافلوا مع من هم أقل حظاً منكم في الحياة .. نفسي نتخلص من الأنانية .. بجد فعلاً .. لو تخلصنا من الأنانية بنسبة ما حياتنا هتتغير ..
كل البشر أنانيين بنسب مختلفة ..
الإيثار جميل برضه شرط ألا يتحول لاستغلال و عبط مستمر .. !!
التكافل حلو و مهم أوي و هو قيمة منسية في المجتمعات .. مع انها قيمة مهمة جدا و بتساعد على تحقيق الاهداف و الرقي بمستوى المجتمع .. أعتقد يعني  :)
رمضان دة أول رمضان أقضيه و نكون كلنا فيه على مائدة إفطار واحدة ..!!
يعني من حوالي 12 سنة .. ماحصلش دة مع أسرتنا الكريمة !!
كل واحد فينا في قارة او في مدينة .. لكن السنة دي كلنا مع بعض ..
فعلاً لمة رمضان حلوة اوي .. و خصوصا مع الناس اللي بنحبهم .
نفسي كلكم تكونوا دلوقتي مبسوطين .. و مرتاحين و حاسين بروح رمضان و بنسماته الجميلة اوي ..
زي مانا مبسوطة و حاسة بيه جدا  ..
ربنا ينول كل واحد فيكم اللي في باله إن كان خيراً له .. و يرزقه خيراً منه إن كان مش خير له .
ربنا يرزق كل الناس صلوات صادقة و تسابيح صادقة ..
ربنا يتقبل منكم كل أعمالكم و دعواتكم ..
و ييسر لكم العبادات في هذا الشهر العظيم ..
عارفة اني باتأخر في الكتابة .. و عارفين إني بحبكم جداً .. و بحب العالم دة كله .. صح ؟؟ :)
كل سنة وانتم طيبين .. جعلكم الله من الشاكرين لنعمه ..
و هنرجع تاني .. :)
و هنحاول نكتب و نلتقي ببعض قدر الإمكان
نورتوا .
( إبتســــــــــــــــامة عريـــــــــــضة .. من القلب )