أم بتحكي ..

هو انت مش هترجع ؟؟ 

امبارح قبل ما تنزل الصبح ، قعدت أقولك خد معاك الجاكيت فوق السويت شيرت الأحمر  ، قعدت تقاوح شوية و بعدين أخدته لما قلت لك علشان خاطري .. سألتك لو كنت شحنت تليفونك .. قلت لي : " أيوة يا أمي أكيد .. "

كنت باعملك كوباية الشاي و باحضر لك كام سندوتش تفطر بيهم .. انت بتحب الجبنة الرومي ، و انا باشتريهالك على طول ..

دورت عليك في البيت لقيتك لسة في الحمام بتسرح شعرك .. و بتغني ..

"اثبت مكانك ..
دة نور الشمس راجع ..

يا تموت و انت واقف ..

يا تعيش و انت راكع "

و قعدت أقولك " ياللا عشان تفطر .. الشاي هيبرد " 

سألتك "معاك فلوس .. ؟؟"

قلت لي : " أيوة يا ماما أنا حوشت الفلوس .. من المصروف "

ضحكت و استغربت و انت بتتكلم و بقك كله أكل .. مش عارفة إزاي قدرت تحوش فلوس من المصروف  .. !!

بس كويس انك قدرت .. شاطر يا حبيبي .. 

صحابك جم تحت البيت و نادوا عليك .. 

شربت الشاي مستعجل .. 

بسرعة خدت كيس الساندوتشات .. و قزازة المية .. و بوستني و انت مستعجل .. و بتقول : "انا ماشي يا ماما.. "

قفلت الباب وراك .. و انا بدعيلك .. " ربنا يحفظك يابني و يجعلك في كل خطوة سلامة .. مالكش دعوة بحد .. ماتتخانقش مع حد .. لما توصل بورسعيد كلمني .. "

بصيت عليك من الشباك .. ماشيين بتغنوا  و بتقولوا : "الأهلي نادي شديد .. نادي حديد ..  أوووو أوووو أووو اعظم نادى فى الكون لو كل الدنيا ضده هفضل احبه بجنون يوم نصره ليا عيد عمرى ما هكون بعيد ..  يوم ما ابطل اشجع هكون ميت اكيد"

دخلت اوضتك .. لقيتها مش متوضبة .. طول عمرك بترمي حاجاتك في كل حتة .. و انا المرة دي مش هوضبها .. عشان كل مرة باقولك ابقى رتب اوضتك و برضه مابترتبهاش .. 

مش عارفة ايه الصور الكتير اللي معلقها على الحيطة دي .. علم الأهلي اللي مثبته فوق سريرك على الحيطة .. 

لسة رامي مجلات الرياضة على الكمودينو ، انت لسة برضه بتسيب كراكيبك القديمة في الدرج .. قلت لك ارمي المجلات القديمة عشان مزبلة الدنيا .. و انت بتقول : " في أحداث رياضية لازم أحتفظ بيها .. "

" طيب لعبك القديمة ؟؟ "

" خليها يا ماما دي ذكريات طفولتي .. "

كلمتني لما وصلت بورسعيد .. " أنا وصلت يا ماما " قلت لك : "خد بالك من نفسك يا حبيبي .. "

قلبي كان مقبوض .. مش عارفة ليه ، يمكن عشان دي أول مرة تسافر بعيد عني ؟؟ يمكن .. 

انت طول عمرك بتروح تشجع في الاستاد هنا .. بس اول مرة تسافر وراهم .. 

نزلت السوق أشتري حاجات البيت .. اشتريتلك بسبوسة عشان عارفة انك هتفرح لما ترجع بالليل و تلاقيها ، و هاحضرلك مسقعة ..

انت بتحب المسقعة .. مش كدة ؟؟ 

رجعت البيت .. عملتلك المسقعة .. و اتغديت مع أبوك .. 

و بالليل .. قعدنا نشوف الماتش ..

الأهلي خسر .. و الناس نزلت الاستاد .. و كتبوا ان في ناس ماتت .. !!

انا و ابوك حاولنا نكلمك تليفونك مقفول .. أعداد اللي ماتوا بتزيد .. انت اكيد تليفونك قطع شحن .. صح ؟؟ 

و لا انت حصلك ايه بالظبط ؟؟

بعد شوية رفعت ايديا للسما ..  انك ترجع لي بالسلامة .. كنت عارفة انك بتجري بسرعة يا حبيبي و هتقدر تخلص من كل دة و ترجع البيت .. كنت عارفة انك كمان ساعتين تلاتة .. كنت متأكدة .. لولا مكالمة صاحبك .. 

ابوك كان بيكلمه .. قال له انك رحت .. رحت يا حبيبي ..

انت رحت فين ؟؟ 

سيبتني ؟؟ سيبتني لوحدي ؟؟ طيب مش هتاكل البسبوسة ؟؟

مش هتيجي تاكل المسقعة طيب ؟؟

طيب بص .. 

انا مش هزعق تاني عشان مابتعلقش هدومك .. و مش هاتضايق عشان مابتوضبش اوضتك ..

و مش هاشتكي من المزيكا العالية .. و مش هاقولك اقعد ذاكر .. 

و مش هاضايقك .. و مش هاقولك مفيش خروج .. 

مش هزعل لو ماجبتش تقديرات كويسة في الكلية .. و حتى لو سقطت ايه يعني يا حبيبي .. ما انت اكيد هتنجح المرة الجاية ..

شوفت بقى انا بحبك إزاي ؟؟ 

بس تعالى .. ارجع .. !!

على الهامش :

_________

 

أنا مش أم .. و احتمال مابقاش أم أبدًا ..  بس انا عندي أم .. و عندي أخ .. و عندي أب ..

أخويا شبه كل الشهداء دول .. أخويا بيحب الأهلي .. و ساعات كان بيروح الاستاد .. !!

أمي شبه كل الأمهات دول .. !!

أبويا بيتعب طول النهار عشان يأكلنا زي كل الآباء .. !!

قلبي مخلوع من مكانه .. !!

مش عدل .. إن أب يروح يدور على جثة ابنه عشان يستلمها .. !!

مش عدل إن تدفن حلمك و تحط عليه طين و تراب ..!!

مش عدل .. 

يا رب .. أنت الحكم .. أنت الحكم .. أنت الحكم ..!!