الثلاثاء، 7 يونيو، 2011

عشان نتخلص من الماضي - 7 يونيو 2011




في موضوع تابع للخبرات الشخصية برضه كنت عاوزة اتكلم فيه من مدة معاكم .. 
و على فكرة الموضوع دة .. ممكن يكون نافع لناس كتير .. أو اتمنى إنه يكون نافع لناس كتير .. 
يا ترى لو حد حبيناه أوي  .. و سابنا .. لسبب أو لآخر ..  المفروض إننا نعمل إيه ؟؟ 
نتخلص من الماضي إزاي ؟؟ 
الحل في الأمر دة كله على بعضه  ..  بيتلخص في كلمة واحدة الإرادة ..
أيوة الإرادة ممكن تخلصك من كل رواسب الماضي .. 
لازم نقرر إننا نقطع الحبل السري الوهمي اللي بيننا و بين الماضي .. و لازم دة يتم بشجاعة.. و مرة واحدة !!
أنا عارفة إن الألم بيكون قوي جداً ..  بس لازم تتكون جوانا قناعة إن الألم دة مسألة وقت .. و أكيد لازم يكون في قناعة شخصية بإن الألم دة محدود  .. لكن هيستمر بس لو إحنا سمحناله إنه يستمر ..
لما تبعد عن  حد .. أو حد يبعد عنك لازم تتخلص من الماضي .. أنا هحطلكم شوية حاجات عملية .. يعني مش كلام نظري .. حاجات انا متأكدة إنها هتجيب نتيجة لو في إرادة حقيقية ..لكن لو مفيش إرادة و لا حاجة هتنفع  .. مافيش حاجة سحرية المفعول .. و مافيش زرار بندوس عليه عشان ننسى .. بس فيه حاجات لازم نعملها و لازم ندي نفسنا الوقت اللازم للعلاج ..  من غير ما نتزنق في الماضي و نبقى مش عارفين نخرج منه .

قبل ما نقول أي حاجة .. الصلاة و العبادات لهم أثر رائع في تخفيف الألم .. و الحاجات اللي هنقولها دي شوية حاجات هتساهم في إنك تعدي فترة الجرح .. و بإذن الله هيكون عندك من العبادات طاقة إيجابية عشان تسحب المشاعر السلبية اللي جواك .

أول حاجة .. إتخلص من اللينكات المباشرة بينك و بين الطرف الآخر ، لأن وجوده معاك في نفس المكان أو المجموعة حتى لو على الماسينجر بيعمل نوع من الضيق أو الألم برضه .. و أعتقد ان الجرح الموجود جواك كفاية أوي .. يعني مش لازم ترش عليه ملح ..!

تاني حاجة .. الذكريات .. كل الصور .. كل الكتب  .. كل الإهداءات .. اللي هي ممكن الواحد يقفل عليه اوضته و يحطها حواليه و يعقد يعيط  لازم تحاول تتخلص منها .. و لو مش عاوز تتخلص منها نهائياً .. يبقى تحطها في علبة او في كرتونة و تشيلها عند حد من صحابك اللي نفسهم يساعدوك تعي المرحلة دي .

تالت حاجة .. الفراغ اللي سابه الشخص المغادر لازم ينشغل بأي حاجة مفيدة ، حاول تتعلم حاجة ماتعلمتهاش قبل كدة أو حاجة كنت عاوز تتعلمها و أجلتها  ، المهم إنك تنشغل في نشاط جديد جذاب بالنسبة لك ، اتعلم لغة جديدة ، العب رياضة جديدة ، اتعلم مزيكا .. المهم انك تحس إنك بتنجز حاجة عشان نفسك .. إرضاء لرغبة أو طموح عندك .. شرط أن يكون ذلك بالتعلم .. عشان دة بيرفع من تقديرك لذاتك أوتوماتيك .

رابع حاجة .. حكاية أكلمه أطمن عليه  .. او أكلمها أطمن عليها  .. ماتقبلهاش على نفسك و ماتعملهاش في حد.. 
لأن الطريقة دي هي أوحش طريقة عرفتها البشرية للمساومة .. أو للتشفي .. !!
ماتقبلش دة على كرامتك .. و لازم تكون مؤمن بدة .. إن عشان تعدي الفترة دي مش محتاج للي سابك و مشي .. إنت محتاج اللي خلقك .. ثم نفسك .. ثم الناس اللي بيحبوك بصدق .. انت مش محتاج للطرف اللي سابك و مشي .. خالص .. و شغل المثاليات دة بتاع نفضل أصدقاء مش موجود .. ماتسمحش لحد يستنزف مشاعرك  .. أو يملاك طاقة سلبية هتعطلك عن تحقيق هدفك في إنك تعدي الفترة الصعبة .. و بالتالي تفضل عايش جوة الماضي .

خامس حاجة .. ماتخجلش من طلب المساعدة العاطفية من صحابك .. لو حاسس إنك محتاج لهم قول لهم دة ..  و اظهر ضعفك .. اعترف بانهيارك شرط ان يكون دة قدام حد يستحق الثقة و مش هيوصل مشاعرك للطرف التاني .. و يكون مستعد فعلاً إنه يساعدك.

سادس حاجة .. لازم تبقى عارف إنك لا أول و لا آخر حد في الكون اتجرح .. أو اتغدر بيه .. أو اتضرب بسكينة في ضهره  .. دة بيحصل كل ثانية لناس كتير غيرك .. و كلهم بيبقوا محتاجين وقت  لنفسهم .

سابع حاجة .. لو انت متأكد إنك عملت كل اللي عليك في العلاقة المنهارة و مقتنع تماماً إنك كنت صادق بما يكفي و قد مسؤولية العلاقة ، يبقى إوعى تحاول تعرف الطرف التاني سابك او بعد عنك ليه .. خليك واثق في نفسك .. الحياة مش هتقف على حد واحد .. و مليانة حاجات جميلة .. ماتضيعش نفسك .. و خليك واعي .


ثامن حاجة .. ماتتكلمش عن الموضوع اللي مضايقك كتير .. عشان لما احنا بنتكلم عن حاجة بنأكدها لنفسنا .. زي ماتكون مذاكر و بتراجع .. و بنزود الوجع حتى لو مش قاصدين .

المهم .. نسأل الله السلامة لأي حد مجروح أو مغدور به .

و تصبحوا على خير ..