الأحد، 12 يونيو، 2011

حد شاف ياسمين يا جماعة ؟؟



ياسمين ..
أنا حلمت بيكي من يومين .. و عاوزة أقولك إنتي واحشاني جداً ..
عاوزة اعرفكم بياسمين .. 
ياسمين هي صاحبة أقصر مدة صداقة عشتها في حياتي .. و أنا فعلاً عاوزة أعرف هي عاملة إيه دلوقتي .
أنا و ياسمين اتقابلنا في 5 يناير 1999  .. كنا مسافرين على مصر للطيران ..
و الطيارة اتأخرت .. و اتعرفنا على بعض  .. 
كانت هي بتدرس في هندسة المنوفية تقريباً .. كانت بتدرس الكترونيات  .. و كان في حياتها قصة حب حلوة اوي . و كان معاها رسالة حب من الولد اللي بيحبها  اللي مش فاكرة اسمه كان احمد او محمد للأسف .. و كان اكبر منها بسنة دراسية .. 
على نفس الرحلة كان في معانا بني آدم غريب كدة .. ياسمين اطلقت عليه اسم استيكر .. لأنه لازق لنا  ..  و اضطرينا في الآخر اننا نحرجه و نقوله إننا مش حابين او مش مستطعمين إن حد يعمل شهم معانا لأننا في غنى عن ذلك .. !!
رسالة الحب اللي كانت مع ياسمين .. كانت كل شوية تفتح تقراها .. متهيألي قرأت الرسالة دي أكتر من ألف مرة في اليوم اللي قضيناه مع بعض ..
كنا في رمضان .. 
و الرحلة اتأخرت لمدة يوم كامل  .. فشركة الطيران حجزت لنا في موفنبيك المطار .. و قضينا انا و ياسمين الليلة دي مع بعض .. برضه ياسمين فضلت تقرا الرسالة اللي معاها .. أنا ساعتها للأسف ماكانش معايا أي رسايل .. :)
بس كنت مستمتعة تماما بكل كلمة بتقولها ياسمين .. و هي بتحكي عن الحب  و المشاعر . و عن الولد اللي هي بتحبه اللي زي الفارس .. يمكن أكثر مروءة و شجاعة ..
ساعتها كنت لسة مش مدركة المعنى لكلمة إن حد يحب حد .. خاصةً إن كل النماذج اللي كنت بشوفها كانت نماذج فاشلة أوي ..  بس ياسمين .. كلامها عن الحب يفتح نفس أي حد إنه يحب .. و يشجع أي حد على إنه يفتح قلبه .. 
على نفس الرحلة برضه كان معانا ام .. عندها بنتين .. الصغيرة فيهم كان اسمها سارة .. البنت الكبيرة كانت غيرانة من البنت الصغيرة .. و انا و ياسمين لاحظنا دة جداً .. 
بعد الليلة اللي نمناها في موفنبيك .. صحينا تاني يوم و رحنا المطار مع باقي الركاب ..  انا و ياسمين قعدنا مع بعض .. 
 كان ليها قريب او معرفة بتشتغل في المطار برتبة كبيرة .. رحنا سلمنا عليه قبل مانسافر .. 
و بعدين لما وصلنا الكويت .. ياسمين كتبت لي رقم تليفون بيتها على ورقة .. و انا سيبتها في المطار و مشيت .. 
و بعدين للأسف الورقة طارت مني لما طلعت برة المطار .. و فقدت وسيلة اتصالي الوحيدة بياسمين ..!!
حاولت افتكر الرقم اللي مكتوب .. ماقدرتش ..!!
ياسمين .. 
مش  عارفة هي فين دلوقتي  .. مش عارفة إذا كانت المدونة دي وصلت لها .. و مش عارفة اذا كان في فرصة اصلا انها تقرا الكلام دة .. 
عاوزة اعرف ايه اللي حصل معاكي يا ياسمين ؟؟ 
يا ترى قصة حبك اكتملت ؟؟؟  يا ترى بقيتي ماما دلوقتي و معاكي بنات حلوين ؟؟
يا جماعة دوروا معايا على ياسمين  .. :)
و لو قابلتوها سلموا عليها .

على الهامش :
كارول نبيل .. الشهيرة بكاندي .. شكراً على الصورة :)